فكرت بالدنيا وشفت التهاويل

السلام الوافي من دنيا الوافي

يالله ياربي عليك التساهيل
تفرج لمن ضاقت عليه الليالي

فكرت بالدنيا وشفت التهاويل
وشفت الزمان اللي بسيفه يلالي

وعجزت اعدلهاعن النقص والميل
وباسبابها قد ذقت مر وحالي

وهليت دمعي من كدرها هماليل
وضاع الجواب اللي بليا سؤالي

والعمر يمضي والليالي تماهيل
وياسعد من قلبه من الهم خالي

وساقتني الخطوه لبعض الغرابيل
ولانيب انا الاول ولاني بتالي

وسجيت رجلي في دروب الرياجيل
واخترت انا منزال فوق العلالي

وخاويت لي ناس قروم وحلاحيل
نسل الرجال اللي لها صيت عالي

اهل الكرم والجود ذباحة الحيل
هم مسندي هم عزوتي راس مالي

وجنبت دربي عن طريق المهابيل
اهل النمايم بين قيل (ن)وقالي

وان عذربوني مالتفت للاقاويل
شخص على ماقيل مثل الجبالي

مالي ورا الانذال شف ومحاصيل
رزقي على ربٍ عزيز الجلالي

وان عشت عمري فالرجاء بالمقابيل
وان مت يامعبود تلطف بحالي

************

اتمنى يروق لكم مانقلت